Praqada Azərbaycan Prezidenti İlham Əliyevin Fransa Prezidenti Emmanuel Makron, Avropa İttifaqı Şurasının Prezidenti Şarl Mişel və Ermənistanın Baş naziri Nikol Paşinyan ilə görüşünün sonunda qəbul edilmiş bəyanatda qeyd edilir ki, Ermənistan Azərbaycanla sərhədə Avropa İttifaqının (Aİ) mülki missiyasının göndərilməsinə razılıq verib. Həmçinin, Azərbaycanla da bu komissiya ilə əməkdaşlığa razılaşdırılıb. Missiya işini oktyabrda başlayıb, 2 ay müddətinə başa çatdıracaq.

Milli Məclisin deputatı Elman Nəsirovun fikrincə, Aİ-nin mülki missiyasının göndərilməsi barədə əldə olunan razılıq Ermənistanın siyasi manipulyasiya getməsi imkanlarını buxovlayan bir yanaşmadır:
 

“Praqada baş tutan bu danışıqların məntiqi nəticəsi olaraq siyasi bəyanat səsləndi. Həmin bəyanatda ilk dəfə gündəmə gələn bir məsələ yer alıb. Bu Avropa İttifaqının Ermənistan-Azərbaycan sərhədinə mülki missiyasını göndərmək məsələsidir.

Onların bu missiyanı göndərməkdə əsas məqsədləri iki dövlət arasında etimad mühitinin formalaşmasına dəstək vermək, eyni zamanda sərhədlərin delimitasiyası ilə bağlı gedən proseslərin hesabatını hazırlamaqdan ibarətdir. Bu çox önəmli məsələdir. Çünki Ermənistanla delimitasiya məsələsində ola bilsin müəyyən razılaşma əldə edilsin.

Amma növbəti görüşdə İrəvan özünü elə apara bilər ki, sanki belə bir razılaşma ümumiyyətlə yoxdur. Ona görə də Aİ təmsilçiləri, mülki missiya ilk növbədə hesabatlar hazırlayacaq.

Burada da əldə edilmiş razılaşmalar istiqamətində görülən işlər qeyd ediləcək. Aİ-nin mülki missiyasının göndərilməsi barədə razılığın olması ümumiyyətlə Ermənistanın siyasi manipulyasiya etmək imkanlarını buxovlayan bir yanaşmadır.
Ümid edirik ki, ilin sonuna qədər sülh müqaviləsinin bağlanması mümkün olacaq. Ermənistanın hərbi təxribatları olmayacağı halda, onun baş verməsi mümkündür. Hər halda, Praqa danışıqları müsbət ab-hava yaradıb. Ona Brüssel formatının məntiqi davamı kimi də baxmaq olar”.