Xerson vilayətinin su basmış ərazilərindən 5 mindən çox sakin təxliyə edilib.
Bu barədə Rusiya Fövqəladə Hallar Nazirliyi məlumat yayıb.
Bildirilir ki, xilasedicilər 154-ü uşaq olmaqla, 1 534 nəfəri qayıqlarla bölgədən çıxarıb. Ümumilikdə, 5 133 nəfər, o cümlədən 178 uşaq və 66 hərəkət məhdudiyyətli şəxs təxliyə edilib.
Bundan əvvəl Rusiya prezidenti Vladimir Putin Fövqəladə Hallar Nazirliyinə zərərçəkənlərə bütün lazımi yardımların göstərilməsini tapşırmışdı .
Qeyd edək ki, Kaxovskaya SES iyunun 6-da qismən dağılıb. Dnepr çayının hər iki tərəfindəki yaşayış məntəqələrini su basıb, sol sahilə rus qoşunları, sağ sahilə isə ukraynalılar nəzarət edir. Tərəflər baş verənlərə görə bir-birini günahlandırır. Xerson vilayətinin qubernatoru vəzifəsini icra edən Volodimir Saldo bildirib ki, su sızması nəticəsində 7 nəfər ölüb, 62 nəfər xəstəxanaya yerləşdirilib. Onun sözlərinə görə, regionda yaşayış evlərinin dağıdılması nəticəsində dəyən zərər ən azı 1,5 milyard rubl təşkil edəcək.