Qərbin Belarusun qanuni seçilmiş prezidenti kimi tanımadığı Aleksandr Lukaşenkonun işğal olunmuş Abxaziyaya səfəri Tbilisini qəzəbləndirib.
Etiraz əlaməti olaraq Belarusun Gürcüstandakı səfiri Anatoli Lis Gürcüstan Xarici İşlər Nazirliyinə çağırılıb.
"Biz Belarus tərəfini suveren dövlətin beynəlxalq səviyyədə tanınmış sərhədləri daxilində ərazi bütövlüyünə hörmət etməyə və beynəlxalq hüququn fundamental prinsiplərinə zidd hərəkətlər etməməyə çağırırıq", - deyə Gürcüstan Xarici İşlər Nazirliyinin bəyanatında vurğulanır.
Öz növbəsində, Gürcüstan prezidenti Salome Zurabişvili Lukaşenkonun səfərini pisləyib və "Twitter"-də yazıb: “Bu, Gürcüstanın işğal olunmuş əraziləri haqqında qanunun, bizim ikitərəfli münasibətlərimiz və beynəlxalq hüquq prinsiplərinin qəbuledilməz pozulmasıdır”.
Gürcüstanın baş naziri İrakli Qaribaşvili də Aleksandr Lukaşenkonun işğal olunmuş Abxaziyaya səfərini və onun Rusiya işğalçı rejimi ilə görüşlərini kəskin şəkildə pisləyib.
"Bu addım Gürcüstanın işğal olunmuş əraziləri haqqında qanunu pozur, həm beynəlxalq hüquqa, həm də ölkələrimiz arasında ikitərəfli münasibətlərə ziddir", - deyə İrakli Qaribaşvili Twitter-də yazıb.