Bakıda anaları narkoman olan 2 azyaşlı acınacaqlı vəziyyətdə aşkar edilib.
Lent.az xəbər verir ki, Nərimanov rayon Polis İdarəsinin əməkdaşları rayon İcra Hakimiyyətinin müvafiq komissiya üzvləri ilə birgə azyaşlıların yaşadığı mənzilə baxış keçirilib. Evə baxış zamanı məlum olub ki, onların anası Çiçək bir neçə ildir ki, narkotikdən istifadə edir. Hətta bir müddət əvvəl uşaqlar ondan alınıb və dayılarının himayəsinə verilib. Həmçinin anaları məcburi tibbi müalicəyə cəlb olunub.
Bu zaman isə uşaqlara əlil olan nənələri baxıb. Ancaq ana müalicədən sonra da vərdişindən əl çəkməyib.
Nərimanov rayon Polis İdarəsinin Yetkinlik yaşına çatmayanlarla profilaktiki işin təşkili bölməsinin əməkdaşları tərəfindən azyaşlılar “Ümid yeri” uşaq sığınacağına yerləşdiriliblər. Analarının isə yenidən məcburi müalicəyə cəlb olunması üçün tədbirlər görülür.
Həmçinin əlil olan nənənin də sığınacağa yerləşdirilməsi üçün iş aparılır.