“İstehlakçılar almadıqları məhsula görə ildə yarım milyard manat ödəyirlər”
Bunu Bizim.Media-ya açıqlamasında Azad İstehlakçılar Birliyinin sədri Eyyub Hüseynov deyib.
O, təəssüflə qeyd edib ki, Azərbaycanda ticarət şəbəkələri təkmilləşdikcə, müasir texnologiyalar tətbiq edildikcə istehlakçıların aldadılmasının miqyası da böyüyür:
“Ticarət şəbəkələrində istehlakçıların aldadılması ilə bağlı həftə ərzində birliyimizə dörd-beş şikayət daxil olur. Şikayətlərin əksəriyyəti vitrində qoyulan qiymətlə kassa çekindəki qiymətlərdəki uyğunsuzluqla bağlı olur. Bu özbaşınalığın tez-tez təkrarlanmasının tək səbəbi qanunvericilikdə olan boşluqdur.
İstehlakçıların hüquqları haqqında qanun Milli Məclisdə 1995-ci ildə qəbul edilib. Ötən 30 ilə yaxın dövrdə isə çox şey dəyişib. Hazırkı qanunvericilik daha çox ticarət şəbəkələrinin maraqlarını qoruyur.
Hazırda ticarət şəbəkələrində qeydə alınan daha bir biabırçı fakt ondan ibarətdir ki, kassa çekinə istehlakçının almadığı malların adı və qiyməti əlavə edilir. Şəxsən mən özüm ilboyu ən azı 10-15 dəfə belə faktla rastlaşmışam ki, kassa çekində almadığım məhsulların adı və qiyməti əlavə edilib”.
Eyyub Hüseynov belə vəziyyətdə nə etmək lazım olduğunu da xatırladıb:
“İstehlakçı, yaxşı olar ki, vitrindəki və kassa çekindəki qiyməti öz telefonunda qeyd eləsin. Bundan sonra məsələ ilə bağlı şikayətini ticarət şəbəkəsinin rəhbərliyinə bildirsin. Rəhbərlik buna laqeyd qaldığı təqdirdə isə İqtisadiyyat Nazirliyinin “195” qaynar xəttinə müraciət etsinlər. Çünki belə qanunsuzluğa görə ticarət şəbəkəsi dörd-beş min manat cərimələnə bilər.
Bizim apardığımız müşahidələr zamanı belə qanunsuzluğu ticarət şəbəkələrində iki səbəblə izah etmək istəyiblər. Bunun birincisi odur ki, hər gün artan qiyməti bəhanə göstəriblər. Deyirlər ki, hər gün qalxan qiymətləri çatdırıb yeniləyə bilmirik.
İkinci bəhanə isə çox gülüncdür - bunu bir çaşqınlıq kimi qələmə vermək istəyiblər. Təbii ki, belə vəziyyətdə mən həmin şəxslərə öz məntiqimlə cavab vermişəm:
“Madam ki, işçiləriniz belə tez-tez çaşırlar, qoy bir dəfə də çaşıb kassada aşağı qiymət vursunlar”.
