Astanada keçirilən sammitdə MDB dövlət başçıları rus dilini dəstəkləmək və tanıdmaq üçün beynəlxalq təşkilatın yaradılması barədə razılığa gəliblər. Bu barədə qərar MDB Dövlət Başçıları Şurasının cümə günü, oktyabrın 14-də keçirilən iclasında qəbul edilib.
Təşkilatın əsas vəzifəsi “rus dili ilə MDB-yə üzv dövlətlərin dillərinin sıx harmoniyasına əsaslanan mədəni-humanitar əməkdaşlığın qorunub saxlanılması və möhkəmləndirilməsidir”. Bu barədə MDB İcraiyyə Komitəsinin saytında məlumat verilib.
MDB-nin nəzdində rus dilinin dəstəklənməsi və tanıdılması üzrə təşkilatın yaradılması təşəbbüsü oktyabrın 7-də Birlik liderlərinin Sankt-Peterburqda keçirilən qeyri-rəsmi sammitində Qazaxıstan Prezidenti Qasım-Jomart Tokayev tərəfindən səsləndirilib.
Rusiya prezidenti Vladimir Putin bu fikri dəstəkləyərək, Moskvanın bunun üçün ən böyük yardımı göstərəcəyini bildirib.
Eyni zamanda, Rusiya lideri xatırladıb ki, MDB dövlət başçıları 2020-ci ilin dekabrında 2023-cü ilin MDB-də millətlərarası ünsiyyət dili kimi rus dili ili elan edilməsi barədə qərar qəbul ediblər.