Böyük Britaniyada 2020-ci ildə COVID-19 ilə xəstəxanaya yerləşdirilən bir kişi hələ də xəstəxanadadır və xəstəliyin nəticələrinə görə ardıcıl üçüncü Milad bayramını orada keçirməyə məcbur olub. 
Təxminən üç il tibb müəssisəsində qalan bir xəstənin hekayəsini “Daily Mirror” yayıb.
59 yaşlı əkiz qardaşlar Stiv və Bobbi Laviner 1984-cü ildən müxtəlif tədbirlərdə DJlik edir. Onlar 2020-ci ilin martında yeni koronavirus infeksiyasına yoluxublar. Hər iki qardaş nəfəs almaqda çətinlik çəkirdi və Bobbi özünü o qədər pis hiss edirdi ki, o, xəstəxanaya yerləşdirilməli və tibbi səbəblərdən komaya salınmalı idi. Buna baxmayaraq, o, xəstəliyin öhdəsindən gəlib. Digər tərəfdən Stiv özünü daha pis hiss edib və qardaşının evə buraxılmasından iki gün əvvəl xəstəxanaya düşüb.
Onu da komaya salıblar, amma oradan çıxandan sonra xarici stimullara reaksiya verməyib. Məlum olub ki, Stivdə sinir sisteminin nadir post-infeksion xəstəliyi olan Hersta - kəskin hemorragik leykoensefaliti inkişaf edib.
Üç ilə yaxındır ki, Stiv gecə-gündüz həkim nəzarətində qalıb və bir neçə dəfə ölüm ayağında olub. Vəziyyətinin ağır olmasına baxmayaraq, yaxınları onun bir gün sağalacağına ümid etməkdə davam edirlər. “Son üç həftədə arvadı onun barmağını tərpətdiyini görüb. Bu cür xırda şeylər reaksiyanın qorunduğunu göstərir. Hər şey düzgün istiqamətdə gedir, o, mübarizə aparır”, - Bobbi bildirib.
Həkimlər kişinin ailəsinə səkkiz həftədən bir Stivi bir neçə saatlıq aparmağa icazə verirlər. 2023-cü ilin yayına qədər qohumları onu evə köçürməyə ümid edirlər, lakin bunun üçün evi təmir etməli və mənzilin daxilini ciddi şəkildə yenidən təchiz etməlidirlər.
Bobbi təmir xərclərini ödəmək üçün pul yığmağa başlayıb. Tələb olunan 65 min funt-sterlinqdən o, artıq yarıdan bir qədər çoxunu yığa bilib. “Onun ruhu hələ də buradadır, bilirəm ki, qardaşım bizi eşidir. Onu evə gətirmək üçün əlimizdən gələni edirik. Hər şey düzgün istiqamətdə gedir. O, orada döyüşür, mən bunu dəqiq bilirəm”, – Bobbi deyib.